Ene ýumruk ýaly,
Ene bir gysym.
Iner ýaly ogullary degişýär:
«Eje, götersene, gel, göter bizi».
Gör, olaň nämeler ýadyna düşýär!
Ýok, ogullar, ejiz indi ejeňiz,
Sizi götermäge güýji ýetenok.
Uçursyz kän göterendir ol sizi,
Ýörän ýodalary şindem ýitenok.
Siz mejalsyz köşekdiňiz birmahal,
Göterle-göterle bolduňyz iner.
Kim size şu ýumruk ýaly enäniň
Göwresinden önen inerler diýer?!
Uçursyz kän göterendir ol sizi,
Ýollarda gerdeni guruşdy gitdi.
Götermek gezegi indi, inerler,
Götermek nobaty, hak, size ýetdi.
Göteriň,
Enäni täç ediň başa!
Göteriň,
Eneden sogap gazanyň.
Ömri uzak bolar,
Ykbaly — aýdyň
Enäniň ýoluna haly ýazanyň!
Ata ATAJANOW,
Türkmenistanyň halk ýazyjysy
1971 ý.
Türkmenmetbugat (turkmenmetbugat.gov.tm)